Mariam Blog | مُدونة مريم: Fangirl By Rainbow Rowell - قراءات | رواية فان قيرل

MyMenu1

Saturday, March 26, 2016

Fangirl By Rainbow Rowell - قراءات | رواية فان قيرل



مساء / صباح الخير
تدوينة اليوم عن كتاب خلصته ,
غير عن نوعية الكتب اللي تكلمت عنها قبل ,
الكتاب هو رواية نوعها دراما و رومنسي و شوية خيال ,
الكتاب باللغة الإنجليزية صارله سنتين تقريباً نزل في 2013 و تصنيفه أدب معاصر يهم فئة الشباب ..

القصة :

يحكي قصة بنت اسمها كاث [ أو كاثر ] و توأمها رين اللي انتقلوا من بيتهم ليبدأوا دراستهم الجامعية و يتركوا أبوهم اللي حالته
النفسية انتكست من بعد ما تركتهم أمهم و رباهم لوحده..

طبعاً رين ترفض تسكن مع كاث في نفس السكن عشانها تبغى تعيش التجربة الجامعية و تعيش حياتها بشكل مختلف عن عيشتها في بيتهم..


كاث بشخصيتها الإنطوائية الخجولة تخاف من الموضوع ذا و تحاول تقنع أختها تتراجع عن قرارها بس ما تقدر فتضطر تسكن مع
بنت ثانية إسمها ريقان ..

ريقان هذي شخصيتها قوية و صريحة [ تعطي في الجبهة يعني  ] 
و دايم نلاقيها مع صديقها الأشقر ليفاي اللي يحب دايم يجلس في غرفة كاث و ريقان

طبعاً كاث كاتبة فان فيكشن " أدب المعجبين " و تعتبر كاث مشهورة ع النت عكس الحياة الواقعية تماماً ,
في الكتاب بين كل فصل و الثاني حاطين مقتطفات من كتابتها و قصتها " كاري اون - سايمون سنو "

الرواية اللي معجبة فيها كاث و تسوي منها فان فيكشن ( سايمون سنو ) ,
تشبه هاري بوتر مرة حتى هي المؤلفة ( رينبو راول ) قالت إنها كانت متأثرة بهاري بوتر ..

الفان فيكشن : 

نوع من الكتابة الإنترنتية لمعجبين يأخذوا قصة مشهورة و يألفوا أحداث و يلعبوا بالقصة الأصلية , النوع هذا من
الكتابة له رواج هائل ع النت بالذات اللي متعلقين بقصة معينة زي هاري بوتر مثلاً .. هو خلص بس تلاقي في النت فان فيكشن له
فيه أحداث جديدة و قصص زيادة ع اللي ألفتها الكاتبة الأصلية .. 

~

الكتاب حبيته و اندمجت مع القصة و الأحداث و تعاطفت مع الشخصيات .
كنت لما أقراه يجي وقت نومي و انا ما أبغى اوقف قراءة و أماطل لين يتأخر الوقت و أقفله ,

تمنيت نهاية القصة تتكلم أكثر عن الأحداث الجانبية في القصة , 
الرواية اللي تنتهي منها بتساؤلات مرات تنرفز و مرات أحبها .. حسيت ان فيه جزء (جانبي ) من الرواية تركته الكاتبة 
بدون لا تتطرق له في النهاية و توضح الأسباب اللي سببت الحدث .. بالذات من جانب رين فيه جزء حسيته كذا خلف الكواليس :| 

حبيت إن الرواية ما تمر بسرعة , مرات لما أقرأ رواية أحس الأحداث سريعة ما تلحقي تخلصي حدث يجي واحد بعده
حلو لما كل حدث ياخذ حقه و القراءة تكون سلسة بس تشبع فضولك و تمشي معاك مترتبه .. مدري كلامي مفهوم ولا لأ 
بس اللي يقرأ روايات بيفهم قصدي 

كثير أوقات لما أقرأ في الأدب الأجنبي بالذات أتحرج من ذكر الكتب أو توصيتها لأحد حتى و إن كانت الكتب ممتازة بسبب 
وجود أفكار أو أحداث في الكتاب لا تناسب أخلاقنا ولا قيمنا ولا تشبه حياتنا أبداً و الشيء هذا مو كل الناس تتقبله ,
 و مو كل الناس تفكيرها منفتح تتجاهل الأشياء السلبية و تركز ع فكرة الكتاب أو القصة بشكل عام ..

و لكن لا أرى أي مانع بخصوص روايتنا اليوم فهي رواية بناتية و دراما و مواقف funny شوية , 
و بسسس الكتاب شريته من جرير ,
أتمنى يسوون منه فلم بيكون حلو لموفي نايت بناتي  

4 comments:

  1. صراحه انا حسيت الاحداث بطيئة جدا بس الكتاب بشكل عام لطيف

    ReplyDelete
    Replies
    1. الأحداث أحسها أخذت وقتها و خلت قراءته مريحة بالنسبالي
      فيه كتب حلو تكون أحداثها سريعة و تحمس و كتب تناسب الأوقات الرايقة و القراءة الخفيفة
      و الكتاب فعلاً لطيف ..
      شكراً ياقمر ع رأيك , ردك أبسطني <33

      Delete
  2. احب اشكال هالكتب ، بس مااعرفه من قبل
    حمستيني عليه 😵❤️❤️❤️

    التصوير يفتح النفس استمري متابعه لك 💕

    ReplyDelete
    Replies
    1. هلا صوفيا
      ان شاء الله تقرينه و يعجبك
      الله يسعدك و انتي ردك يفتح النفس <3

      Delete

Comment as : Name , Url / Anonymous
خيارين لتعليق من ليس لديه حساب قوقل واحد بالإسم و الآخر تعليق فقط ..