Thursday, March 12, 2015

Drugstore Haul | مشترياتي من صيدلية النهدي




السلامُ عليكم /
قبل كم يوم رحت صيدلية النهدي و اشتريت كم حاجة , 
صيدلية النهدي داااايم أشتري منها تقريباً كل شهر لازم أمرها و صرت حافظة ترتيب المنتجات و وين الاقيها ,

أحب اقتني منتجات العناية أكثر من المكياج و يهمني هالجانب أكثر يمكن واضح لأن للآن مافيه ولا منتج مكياج 
تكلمت عنه في المدونة 
لكن قريب إن شاء الله بتكلم عن منتجات ايلف و سليك الموجودة عندي و غيرها من مواضيع مكياج .. 
خلوني أبدأ بالمشتريات من اليسار لليمين  ..

سائل إستحمام فازلين تغذية فعالة بعصير الرمان :
اللي شدني له ريحته ريحة حلاوة علك شيء زي كذا لذيذة الريحة و تجنن , جربته و حبيته هو مافيه شيء مميز صراحة غير الريحة
زيه زي اي سائل استحمام ينظف بشكل جيد , طبعاً جربت من قبل نوع ثاني لونه اصفر بس ما حبيته ريحته غريبه :| 
سعره 28 ريال

فرشاة اسنان من اوركس :
مجرد فرشاة اسنان عادية سعرها 16 ريال قوتها متوسطة 

مرطب تفتيح الوجه من كلين اند كلير خالي من الزيوت :
معاناتي مع المرطبات ماتخلص ما قد لقيت مرطب راضية عليه تمام الرضا لكن نجرب ذا لعل و عسى يكون غير 
فيه حماية من أشعة الشمس .
سعره 16 ريال

كريم الإصلاح و التجديد الليلي من بوندس :
سمعت من وحده لبنانية أمورة تقول بشرتها دهنية و ما تستعمل مرطب للنهار كل اللي تسويه تستخدم مرطب قوي قبل تنام و لمى تصحى 
تغسل وجهها و تحط مكياجها و تكمل يومها 
حبيت الفكرة لأن حتى لو الكريم بيدهن وجهي و بيخليه يلمع ما بيزعجني لأني نايمه فيعطيني الترطيب و التغذية اللي احتاجها و 
لأنه قوي ما بيخليني احتاج احط ثاني في النهار 
حبيت آخذ كريم بوندس اساساً عشان يكون مرطبي الليلي و جربته و حبيته اصحى وجهي رويان و مترطب بس مازلت في بداية 
استخدامي له فما بحكم عليه لسى بدري
سعره 30 ريال

جل التنظيف العميق نورماديرم من فيشي  :
هالغسول مخصص للبشرة الدهنية قد استخدمته قبل و حبيته و سويت عنه ريفيو هنا

بخاخ مثبت للشعر مع حماية من الحرارة من سيوس  :
أخذته ع اساس ابغى شيء يحمي شعري من حرارة أجهزة تصفيف الشعر من ستريت و فير و مجفف و يوم رجعت البيت اكتشفت انهم كاتبين 
لا يستخدم قبل اجهزة التصفيف ! طيب كيف بيحميلي شعري منها ... [  جزاء اللي ياخذ و ما يقرا زين   ]
المهم هذا طلع مثبت للشعر من مجموعة هيت بروتيكت تحمي الشعر من الحرارة ( الظاهر قصدهم حرارة الشمس ) لأن فيه منتج
آخر من المجموعة يستخدم قبل أجهزة التصفيف و يحمي الشعر منها , يلا نجربه وش ورانا ..
سعره 25 ريال 

حجر ازالة الجلد الميت ( حجر خفاف ) :
هذا عبارة عن حجر خفاف حاطين له مقبض عشان يسهل استخدامه بستخدمه لتقشير اسفل الرجل و الكعب , كاتبين بالإنقلش انه 
يستخدم لإزالة مسمار القدم 
لكن انا ماعندي هالمشكلة و ماراح افتي فيها و لكن اذا كان عندك و حابه تستخدميه ابحثي و اسألي قبل , أنا كل استخدامي له 
تقشير و تنعيم اسفل القدم فقططط 
سعره 25 ريال 





قطن مدور من جونسون :
هاذي ثالث مرة تقريباً آخذه إستخداماته ماتخلص الحلو فيه انه جودته حلوة و سعره رخيص .  عيبه الوحيد إنه مو مره متماسك 
حق بودي شوب متماسك و مضغوط أكثر منه لكن ماهو بفرق كبير كلهم طبقاتهم تفترق مرات لكن هالشيء ما يضايقني . 
سعره : 12 ريال

لوشن دوف بزبدة الشيا و الفانيلا :
يشبه لوشن اللوز و الكركديه اللي جربته قبل و كتبت عنه في انستقرام هنا هم نفس الشيء الغير الريحة فقط هذا ريحته فانيلا , 
ترطيبه متوسط و يمتصه الجسم بسرعه .

ماسك لوريال إلفيف سموث إنتنس [ ماسك منعم بالسيروم يحتوي على زيت الأرقان و حماية من الحرارة ] :
الماسك جربته من قبل و هذي ثالث مره آخذه طبعاً هو نعم شعري و عطاه ترطيب و منظر صحي و ملمس جميل جربت ماسكات 
قبله من لوريال 
و ماحسيت معها بفرق اما هذا فجداً انبسطت من نتيجته و برجع اشتريه اكيد  و بما إن الحامي من الحرارة طلع مثبت عزاي في 
هذا يحميلي شعري D:
سعره 39.95 عاد مدري يحسبونها لكم 40 ولا علك نوفا [  دُعابة ]  بس أذكر كان أرخص من قبل 

كريم سنفرة للجسم و الوجة بالمشمش من نيتشرز باونتي :
هذا المقشر ممتاز ريحته حلوة و يترك الجسم ناااعم بعد استخدامه , ما استخدمته لوجهي أبداً للجسم فقط قد جربته قبل و حبيته 
سعره 28 ريال

صابون البابايا 3 في 1 :
هالصابونه جربت من قبل أنواع كثيره منها مرات أحبها و مرات اكرهها لكن اللي متأكده منه انها تجفف اشتريتها بستخدمها كتغيير
لأن من زمان ما استخدمت صابونة للجسم دايم غسول فبجربها 
سعرها 12.50 ريال 

أداة إزالة الرؤوس السوداء من تيتانيا :
معروفة و معروف استخدامها جربتها و نفعتني , قلت قبل فترة اني بريح بشرتي من الغسولات القوية و صرت استخدم حاجات خفيفة و بصراحة 
وجهي ماهو بنفس وضعه لما كنت استخدم فيشي و الدهون و الرؤوس السوداء زادت فقلت اشتريها و جربتها مره و حبيتها , 
وجودها مهم لكل وحده تعاني من تكون الرؤوس السوداء أو البيضاء ( الدهون ) 
سعرها 15 ريال

صورة أقرب للأداة





هذي كل مشترياتي حاجات مكررة و حبيتها من قبل و حاجات أول مره آخذها لو عندك سؤآل عن شيء لاتترددي 
[ الأسعار كاتبتها من الفاتورة فمتأكده منها 100% ] , شكراً ع قراءة مدونتي أتمنى إني أفدتكم ولو بمعلومة صُغننه 



1 comment

Comment as : Name , Url / Anonymous
خيارين لتعليق من ليس لديه حساب قوقل واحد بالإسم و الآخر تعليق فقط ..

© Mariam Blog | مُدونة مريم. Made with love by The Dutch Lady Designs.