Mariam Blog | مُدونة مريم: The Body Shop Vitamin E Aqua Boost Sorbet | ريفيو مرطب الوجه اكوا بوست سوربيه

MyMenu1

Friday, January 23, 2015

The Body Shop Vitamin E Aqua Boost Sorbet | ريفيو مرطب الوجه اكوا بوست سوربيه



السلام عليكم ~
بوست اليوم عن مرطب للوجه من ذا بودي شوب اللي هو اكوا بوست سوربيه بفيتامين إي ..
هو عبارة عن جل خفيف ينعش و يرطب البشرة يحتوي على فيتامين إي و زيت جنين القمح.
قوامه خفييف و ملمسه ناعم مره ..

يوصف الأكوا سوربيه بفيتامين إي إنه فوراً ينعش و يبرد الوجه و يدوم طول اليوم , و إن هالسوربيه ذا القوام الخفيف
جداً يروي عطش البشرة و يعطيها دفعة انتعاش , و أيضاً انه ذا ملمس حريري و غني بزيت جنين القمح ;
هالمنتج تقييمه في موقعهم 4.2 من 5 يعني شيء يحمس صراحه هالترفيع كله لازم يطلع شيء مميز ..

طريقة إستخدامه زي أي مرطب بعد ما تغسلي وجهك تحطيه ,
لما استخدمته لاحظت عليه انه ما ياخذ وقت طويل لين تتشربه البشرة و يعطيها ملمس ناااعم ..

تجربتي معاه :
بخصوص ترطيبه ترى ماهو قوي ترطيبه خفيف مره يناسب البشرة الدهنية لكن لو بشرتك جافة او حابه مرطب قوي
لا تعتمدين عليه

أول شيء لاحظت أنه ما يدهن وجهي ممكن في البداية اول ما احطه بس بعدها يخف اللمعان و يصير منظر وجهي طبيعي
مو جاف ولا مدهن .. لا عادي

شيء ثاني لاحظته انه ما يقبل الفرك او التدليك و أنا من الناس اللي تاخذ راحتها مع المرطب ادلك بشرتي فيه عشان تتشربه,
و هالمرطب لازم توزعيه بسرعة بدون فرك ولا بيطلع زي القشور في يدك لازم بسرعه

و هالشيء كرهني فيه ما آخذ راحتي اجلس قلقانه و طول ما انا حاطته ما ابغى المس وجهي عشان مايطلع زي القشور في يدي
 و هالشيء كل مره احطه فيها الاحظه .. إحساس مزعج جداً , لما المس بخفه الاحظ نعومة وجهي لكن لما امشي يدي ع وجهي
تطلع فيها قشور من السوربيه

طبعاً بما إن السوربيه خفيف قلت احطه تحت عيني اجربه فضول يعني ,
حطيته و حسيت بحرقان خفيف استمر دقيقة تقريباً و بعدها اختفى مو مره مزعج بس هالمنطقة حساسة فما نبغى نأذيها :(
هالحرقان ما حسيته في وجهي أبداً بس تحت عيني ..

سعره :
79 ريال

تجربتي معاه غير مرضيه للأسف و ماراح أرجع آخذه , بالنسبالي المنتج لازم يكون مريح في الإستخدام !
و هالمنتج ما كان مريح ..

طرق الناس تختلف و تفضيلهم للأشياء يعتمد على ذوقهم و طريقة استخدامهم للمنتج فيه ناس لازم يكون المنتج 10 من 10
عشان ترضى عليه و تحبه , و فيه ناس تتقبل القصور في بعض الجوانب عشان هالمنتج وفرلها خاصيه تحبها زي مثلا المنتج
ما دهن وجهي أو بسرعه امتصته البشره أو ريحته حلوه فتلاقيها خلاص اتغاضت عن بقية عيوبه عشان هالشيء ;

لازم الواحد يحط بالحسبان هو ايش يبغى بالضبط من المنتج و يعرف احتياج بشرته و ذوقه الشخصي عشان يحدد هو يناسبه
أو لا ..

معلومة شاطحه : 
طبعاً السوربيه هو نوع من المثلجات مصنوع من الماء المحلى و الفواكه غالباً مبرده و منعشه في الصيف و عشان
هالمنتج اسمه سوربيه و عشانه منعش و مبرد للبشرة فيه ناس تحطه في الثلاجة عشان "حرفياً" تبرد و تنعش بشرتها 
وقت الإستخدام .. حلوة الفكرة جربوها لو عندكم المنتج ,

و بس هذا كل اللي عندي ..
خلص بوست اليوم و البوست الجاي بإذن الله عن غسول مخصص للبشرة الدهنية تجربتي معاه كانت حلوه 

2 comments:

  1. الله يعطيك العافية افدتيني كنت افكر اشتريه بس الحمدلله قريت كلامك قبل

    ReplyDelete
    Replies
    1. يعافيك و يسعدك و الحمدلله افدتك ذا الشيء يسعدني ,
      نورتي مدونتي <3

      Delete

Comment as : Name , Url / Anonymous
خيارين لتعليق من ليس لديه حساب قوقل واحد بالإسم و الآخر تعليق فقط ..